இனிக்கும் தமிழ் !!

ஜெய் குருதேவ் !!

என்னதான் இருந்தாலும் , அவங்கவங்களுக்கு அவங்க தாய் மொழி அமிர்தம்தாங்க , இல்லையா ?!

தமிழ் 

கேட்க இனிக்கும் ...

பேச இனிக்கும் 

எழுத இனிக்கும் 

படிக்க இனிக்கும் 

அட ...

பழகவும்  இனிக்குங்க !! 

************************************************************************************************************
நம்ம தமிழே ஒவ்வொரு ஊரிலும் , ஒவ்வொரு விதமா  பேசப்படுகிறதில்லையா ...

சென்னைத் தமிழ் , நெல்லைத் தமிழ் , கோவைத் தமிழ் , மதுரைத் தமிழ் அப்படின்னுட்டு .

 இந்த கோவைத் தமிழ் எடுத்துகிட்டம்னா , 

ஒரே மரியாதை தான் போங்க !!

சும்மா , வார்த்தைக்கு ஒரு "ங்க" சேர்த்து , மரியாதை மழையா பொழிஞ்சு  தள்ளிடுவாங்கன்னா பார்த்துக்கோங்களேன் !!

 கோவைக்கு மாற்றலாகி போன ,  நம்ம நண்பர் ஒருவர்  சொன்னாரு  ,

" அட , அதை ஏன் கேட்கற ...

கோவையில , கன்னாபின்னான்னு சண்டை போட்டுக்கிறவங்க கூட , "வாங்க" , "போங்க " அப்படின்னு மரியாதை குறையாம தான் பேசிக்குவாங்க. பார்க்க ரொம்ப தமாஷா இருக்கும்  !!"

அது அப்படின்னா , சென்னைத் தமிழ் அதுக்கு நேர்மாறா இல்ல இருக்கும் .

" இன்னாம்மா இன்னா ...படா பேஜாரு பண்ணிகினு கீறியே ,  ஒடம்பு எப்படி கீது ?" 

 தமிழ் எப்படி பேசக் கேட்டாலும் இனிக்கத்தான் செய்து !! 

***********************************************************************************************************

நம்ம தமிழ்நாட்டுக்காரங்க மாதிரி யாரும் பழமொழியும் , குறள் ,ஆத்திசூடி போன்றவைகளை அன்றாட உரையாடல்களில்  உபயோகிக்கிறதில்லைன்னு நினைக்கிறேன் .

எந்தவொரு காலக்கட்டத்துக்கும், நிலைமைக்கும் ஏற்றவாறு , எண்ணற்ற பழமொழிகளைச் சொல்லிவிட்டு சென்று விட்டார்களே நம் பெரியவர்கள் .

என் நண்பர் ஒருவர் , ஆச்சர்யம் மிகுந்த தொணியில கேட்பார் , "அதெப்படி எல்லாவற்றிற்கும் ஒரு பழமொழியை  எடுத்துவிடுகிறீர்கள் , தமிழர்கள்  நீங்கள்  ?!" என்று . அவர் ஆர்வத்துடன் அதன் ஆங்கிலமொழி பெயர்ப்பையும் கேட்டு வியந்து போவதைக் கண்டு , நம் தமிழ் மீது , எனக்குப் பெருமையாக இருக்கும் .

***********************************************************************************************************
இடத்துக்கு தகுந்த மாதிரி மனுஷங்க தங்கள் பழக்க வழக்கங்களை  மாத்திக்கிற  மாதிரி , 

தமிழ் கூட தன்னை மாத்திக்குது என்பதில் ஆச்சர்யம் என்ன ?

கர்நாடக எல்லையிலிருக்கும் ஓசூர் மற்றும் பெங்களூரிலிருக்கும் தமிழ்-ல சில எடுத்துக்காட்டு :

*ஆமாவா ? * 

*அப்படியா * வை ஆமாவா ன்னு மாத்திட்டாங்க .ஆரம்பத்துல இது என்னடா தமிழும் இல்லாமா , கன்னடமும்  இல்லாம ஒரு மொழி , அப்படின்னும் தோணும்.அப்புறம் பழகிடுச்சு .

************************************************************************************************************என் கூடப் பணி புரிபவர் ஒருவருக்கு  தமிழ் கத்துக்கணும்னு ரொம்ப ஆசை .

அவருடைய தாய் மொழி தெலுங்கு.

அவர் என்கிட்டே , " மேடம் , எனக்கு தமில் பேசக் கத்து குடுங்க !" அப்படின்னு கேட்டார் ஒரு நாள் .

"அதுக்கென்ன , கத்துக் குடுத்தாப் போச்சு , 

ஆனா முதல்ல *தமிழ் * என்று சரியாக உச்சரிக்கக் கத்துக்கோ ...அப்புறம் பார்க்கலாம் !" என்றேன் நான் .

பாவம் , அவரால் இன்று வரை , தமிழை தமிழ் என்று உச்சரிக்க முடியவில்லை . 

ஆமாம் ,நம்மூர்ல கூட , ஸ்டைல்-ஆ , கன்னாபின்னான்னு ,டாமில் , தமிள் , டேமில் என்று சொல்வதைக் கேட்டால் என்னவோ போலிருக்கும் . சில சமயம் கோபமே வந்துடும் !!

 ********************************************************************************************************

அன்பு மற்றும் புன்னகையுடன் ....

உங்கள் சுவேதா